LAOAG CITY – Ipabus-oyen ti Department of Justice iti panel of prosecutors a mangiggem iti reklamo mainaig iti panagpukaw dagiti mammallot.
Daytoy ti inrakurak a mismo ni Department of Justice Secretary Jesus Crispin Remulla kalpasan a naalaan ti komento na iti nasao a kaso.
Nagkedked met daytoyen a nangipaay ti rakurak mainaig iti kaso dagiti nagpukaw a mammallot gapu ta maysa daytoyen nga aktibo a kaso.
Inlawlawag na nga iggem daytoyen ti panel of prosecutors kalpasan ti naiyuswat nga ebalwasyon iti reklamo nga inpila ti kabagyan dagiti mapukpukaw a mammallot.
Inpalgak na a pabus-oyanen nga agsarita dagiti agsinumbangir a partido iti maiyuswat a preliminary investigation ti kaso.
Maipalagip a nagpila ti reklamo ti kabagyan dagiti mapukpukaw a mammallot ti serious illegal detention ken multiple murder kontra iti negosyante a ni Charlie Atong Ang, Gretchen Barretto, ken dadduma pay.
Naikeddeng ti preliminary investigation intono Setyembre 18 no sadinno a possible nga agsango ti dua a partido.
Kabayatanna, inrakurak met ni Justice Assistant Secretary Mico Clavano a ti agkabsat a Julie ken Elakim Patidongan ket kasapulan paylaeng a makasoan sakbay a ma-discharge tapno alaen kas ‘state witness’.
Kuna na a no kayat ti dua a ‘whistleblower’ a dumalan iti nasao a protection program, masapol a dumalan da nga umuna iti nadakamat a proseso.
Mainaig iti daytoy, nasaludsud met ken ni Justice Spokesperson Clavano ti sitwasyon dagiti ‘technical divers’ ti Philippine Coast Guard kalpasan a nagsasakit dagitoy gapu iti panangbatbatok da ti danom iti Taal Lake.
Inpasigurado ni Clavano nga adda iti natalged a kasasaad dagiti nadakamat a technical divers ti Philippine Coastguard.
