LAOAG CITY – Isagsaganan ti Department of Justice dagiti sumagmamano a kaso a mabalin a maipila kontra kadagiti suspek a mapaneknekan a karaman iti panagpukaw dagiti mammallot.
Segun ken ni Justice Secretary Jesus Crispin Remulla, daytoy ti maysa kadagiti tututukan dagiti abogado ti departamento mainaig iti kaso.
Kuna na a naiget nga ad-adalen ti Department of Justice dagiti kaso a maipila mainaig iti isyu ti ‘missing sabungeros case’.
Inbatad na a malaksid iti murder case, possible nga adda pay ti dadduma a kaso a maipila kas ti ‘kidnapping’ a maiyallubog iti International Humanitarian Law nga ikonkonsiderar da.
Kabayatanna, mainaig iti panagbirbiruk ti departamento iti bangkay dagiti mapukpukaw a mammallot, kuna ni Justice Secretary Remulla a ti agtagikua iti fish pond iti Taal lake a ground zero iti diving operation ket im-imbestigaren da payen.
Inpalgak na a karaman pay daytoy iti krimen wenno ti
disposisyon ti pannakapapatay dagiti biktima a mapapati a naitabon iti nasao a lokasyon.
Inpaganetget ti sekretaryo a saanna a ma-imagine no kasanu a naisayangkat ti ‘execution’ dagiti biktima gapu ta rumrumuar a ti dadduma kadagitoy ket naitabon a sibibiag pay.
Iti agdama ket katulungan ti Department of Justice ti nagduduma nga ahensiya ti gobyerno tapno iyuswat ti opisyal a pannabatok ti nasao a paset ti Taal Lake.
Nagkiddaw payen ti ahensya ti tulong ti Japan tapno agpabulud ti sumagmamano a nayun a kagamitan para iti plano a kaunaan nga exploratory dive iti Taal lake.
