LAOAG CITY – Inrakurak ti Department of Justice ti naan-anay a suporta na iti pannaki-alyansa na iti Philippine National Police .
Gagem ti panagtipon ti pwersa ti Department of Justice ken Philippine National Police ket tapno masigurado a makabukel kadagiti kalidad a kaso a maipila.
Daytoy ket kalpasan a sumagmamano a kaso nga inpila dagiti kameng ti Philippine National Policeiti korte ket masansan a maibasura uray dimmalan iti naiget nga imbestigasyon.
Segun ken ni Justice Secretary Jesus Crispin “Boying” Remulla, sidadaan a mangawat iti addang ti Philippine National Police kangrunaan na ti panangbukel kadagiti komite tapno balbaliw nga irebisar dagiti kaso nga inpila da ngem naibasura.
Kuna ni Remulla a maki-collaborate ti Department of Justice tapno masolbar ti panagkurkurang dagiti kaso nga ipilpila ti Philippine National Police.
Innayon ti sekretaryo a dagiti prosecutor da ket maaddaan ti proactive a pannakipartisipar iti case build-up .
Iti bileg ti Department Circular No. 20 series of 2023, dagiti prosecutor ket nabilin nga agbalin a proactive no manayunan ti kaso, maikkan da ti naan-anay nga ammo iti panangpatalged iti maysa a napigsa a prima facie a kaso a supsuportaran ti aktwal nga ebidensya, dagiti testigo, ken dokumento.
Mainaig iti daytoy, inpakaammo ti Philippine National Police a dagiti opisyal da nga agig-iggem kadagiti kaso a naibasura ket dumalan kadagiti refresher courses tapno papigsan ti ammo da bayat a dagiti madutukan kas imbestigador ket masapol a nagturpos iti maiyannatop a kurso ken addan dagiti naipangabak da a kaso.
