LAOAG CITY – Pinilaan ti Department of Justice (DOJ) ti qualified trafficking ken child exploitation dagiti dua nga indibidual a natiliw iti entrapment operation gapu iti maipagarop a panangilako da ti kaipasngay a maladaga nga anakda iti P90,000.
Basar iti resolusyon ti National Prosecution Service (NPS), napilaan da Arjay Escalona Malabanan ken Ma. Chariza Rivera Dizon ti kaso gapu iti panaglabsing da iti Republic Act No. 9208 wenno ti Anti-Trafficking in Persons Act of 2003 ken ti Republic Act No. 7610, wenno ti Special Protection of Children Against Abuse, Exploitation and Discrimination Act.
Inbatad ti National Prosecution Service nga adda ti makaumanay nga ebidensya kontra kada Malabanan ken Dizon, a natiliw iti entrapment operation iti maysa a simbaan idiay Dasmariñas City, Cavite.
Nailanad pay iti resolusyon a ti maipagarop a napasamak a krimen ket naipatungpal babaen iti panagusar ti Information and Communication Technology system.
Maipalagip nga iti babaen ti Republic Act No. 11462, wenno ti Domestic Administrative Adoption and Alternative Child Care Act, ti panagampon wenno dadduma a wagas ti alternatibo a panangaywan iti ubing ket imatmatonan ti National Authority for Child Care.
Iti statement, inkari ni Justice Secretary Jesus Crispin Remulla a parmeken na ti “online black market” a pakailaklakoan dagiti kaipasngay a maladaga.
Inpaganetget ni Remulla a dagiti ubbing ti kangrunaan a gameng iti komunidad a nasken a protehiran ti linteg.
Innayon na a dagiti ubbing ti kapatgan nga investments ita ken kadagiti sumarsaruno nga aldaw, ken saan da a palubusan ti siasinno man a manggundaway kadakuada iti aniaman a wagas.
