LAOAG CITY – Nakariing ti maysa a doctor iti Richmond, Virginia kalpasan a maduktalanna ti maysa a paniki ti aggangandat a sumrek iti ngiwatna bayat a matmaturog daytoy.
Segun ken ni Dr. Krista Edelman, maysa a gastroenterologist, a ti ammo na ket paset laeng ti tagtagainep na daytoy ngem arigna ket kasla adda ti bassit a bao a kayatna ti sumrek iti ngiwatna.
Insigida met a nagturong daytoy iti emergency department ti St. Mary’s Hospital tapno agpakonsultar.
Inbatad met iti assistant medical director ti emergency room a kasapulan a seryosoen ti sitwasion gapu ta posible nga adda ti rabbies ti paniki a mabalin a rason ti pannakatay.
Rimuar a negatibo ti rabies ti resulta ni Edelman ket nagballaag daytoy iti publiko nga ibalod ti paniki ken makikoordinar iti local health department wenno animal control para iti umno a pannakabayabay.
