LAOAG CITY – Pinalagipan ni Ms. Fresnaida Gundan, mangidadaulo ti Department of Labor and Employment (DOLE) ditoy probinsya dagiti amin nga employers a masapol nga agisubmitir da ti compliance report.
Daytoy ket pakaseknan iti panagbayad wenno pangited da ti 13th month pay sakbay ti kaaldawan ti paskwa.
Segun kenni Gundan, nakalanad iti report ti nagan ken no mano ti naawat ti maysa nga empleado ken nasken nga adda ti pirma ti kada empleado kas pammaneknek a nakaawat da ti 13th month pay.
Binalakadan na pay dagiti amin nga empleado a no saan da a makaawat ket nasken nga ipakammo da iti DOLE tapno adda ti maiyuswat da nga addang wenno tapno maimbestigar ti nasao a banag.
Inbatad na pay a nasken a saan a mabutbuteng dagiti empleado nga agipulong gapo ta ti nasao nga addang da ket rumbeng na a saan nga isu ti rason a pakaikkatan da iti trabaho da.
