LAOAG CITY – Inbilin ni Department of Labor and Employment (DOLE) Secretary Benny Laguesma dagiti amin a regional directors nga iberipikar dagiti report kontra kadagiti Business Process Outsourcing companies a maipagarup a pilpilitenda a pastreken dagiti empleado iti baet ti iduduprak ti Bagyo Uwan.
Inbatad ni Laguesma, pagpalawagen dagiti kompania no apay nga inkapilitan a paspastrekenda dagiti mangmangged nga ag-report iti baet ti narisgo a kondision.
Inlawlawagna a saan a palabsen ti Department of Labor and Employment ti aniaman nga addang a mangikabil iti peggad kadagiti mangmangged.
Inpasigurado ni Laguesma a prioridad ti ahensia ti kinatalged ken pagsayaatan dagiti mangmangged kadagiti nagduduma nga industria saan laeng iti Business Process Outsourcing sector.
Manamnama nga agisubmitir nga insigida ti report dagiti regional office mainaig kadagiti addang nga insayangkat.
Immuna iti daytoy, inrakurak ti grupo a Business Process Outsourcing Industry Employees Network wenno BIEN Pilipinas a rinibu a Business Process Outsourcing workers ti agtultuloy a pilpiliten a pastreken iti baet ti narisgo, panaglayos ken pannakapukaw ti kuriente.
Naammoan a sumagmamano kadagiti mangmangged ket maipagarup a butbutngen ti Notice to Explain, ik-ikkatan ti insentibo wenno pilpiliten nga ag-report onsite uray delikado.
