LAOAG CITY – Inlawlawag ti Department of Labor and Employment nga awan ti naituding a panagngato iti sweldo iti intero a pagilian inton May 1, Labor Day.
Segun ken ni Labor Secretary Bienvenido Laguesma, nakadependar kadagiti rehiyon iti panag-adjust ti sweldo babaen iti Regional Tripartite Wages and Productivity Boards (RTWPBs).
Inlawlawag ni Laguesma a kongreso laeng ti mabalin a mangipatungpal ti linteg para iti across-the-board wage hike.
Maibasar iti inflation, presyo dagiti magatgatang, ken kondisyon iti ekonimiya sakbay a maipangato iti sweldo.
Kunana pay nga uray adda panawagan a P200 wage hike manipod ti labor groups ket dumalan paylaeng daytoy iti regular a proseso iti wage boards.
Innayon na nga amin a rehiyon ket nangipatungpalen ti adjustments iti tawen 2025-2026 wage cycle.
Inbatad pay iti Department of Labor and Employment a mangrugi inton Mayo ti baro a wage cycle para iti tawen 2026-2027 no sadinno a trataren iti tripartite boards karaman iti gobyerno, employers, ken empleyado ti posible a panagngato iti sweldo.
