LAOAG CITY – Inpasingked ti Department of Labor and Employment (DOLE) kadagiti manggagawa nga agtultuloy ti panangadal ti regional wage boards kadagiti petisyon para iti pannakaipangato ti sweldo.
Daytoy ket kalpasan a napaay dagiti agpanpanday linteg a nangratipikar iti nailungalong a legislated wage hike.
Segun ken ni Labor Under Secretary Benjo Benavidez, agtultuloy dagiti konsultasyon ken dagiti panagdengngeg nga iyus-uswat ti Regional Tripartite Wage and Productivity Boards (RTWPB) para iti umento iti sweldo para kadagiti mangmangged kadagiti rehiyon.
Kas pammaneknek, iti National Capital Region, addan ti pannagna ti proseso tapno i-assess no kaano ken mano ti mainayun iti minimum wage rate iti rehiyon.
Inlawlawag pay ti sekretaryo a dagiti saan a naipasa a nailungalong a gakat ket balbaliw a maipila iti sumaruno a kongreso.
Innayon na a no mapasamak daytoy ket nakasagana ti ahensya a mangaramid ti pagrebbengan na iti panangipaay ti opinyon ken technical input para iti naiget a pannakarepaso ti gakat.
