LAOAG CITY – Kinumpirmaran dagiti maseknan nga ahensia ti gobierno nga awan ti iggemda a listaan dagiti nagan dagiti benepisiario para iti Ayuda sa Kapos ang Kita wenno AKAP Program iti baet a nangrugi daytoyen iti napalabas a tawen.
Iti panagdengngeg ti Senate Committee on Social Justice, Welfare and Rural Development, sinidir ni Senadora Imee Marcos ti Department of Labor and Employment (DOLE) ken Department of Social Welfare and Development (DSWD) seknan iti kinaawan ti listaan dagiti nagan dagiti minimum ken below minimum wage earners a naipaayan ti ayuda.
Inbatad ni Department of Labor and Employment Undersecretary Benjo Santos Benavidez, nga awan ti nagan dagiti empleado nga agsusueldo ti minimum ken ti datos nga adda kadakuada ket bilang laeng para kadagiti minimum wage earners.
Inbatadna nga adda ti proseso tapno maammoan no asino dagiti makapaspastrek ti minimum kadagiti kompania ken maysa kadagiti inwayat a survey ti Philippine Statistics Authority iti tunggal kompania nga adda ti lima a milyon ti nairekord a minimum wage dagiti empleado.
Mainaig iti daytoy, kinumpirmaran ni Department of Social Welfare and Development Undersecretary Aliah Dimaporo nga awan ti listaanda dagiti nagan dagiti benepisiario para iti AKAP Program.
Inpetteng ni Dimaporo, uray awan ti listaan, adda ti guidelines ken requirements tapno makaawat iti AKAP.
Kabayatanna, insingasing ni Former Supreme Court Associate Justice Antonio Carpio nga alaen dagiti nagan ken ti balor dagiti nakaawat iti AKAP no no asino ti nangirekomendar kadakuada.
