LAOAG CITY – Kinontra ni Labor Secretary Bienvenido Laguesma ti pannakairaman ti Pilipinas iti listaan ti International Trade Union Confederation’s top 10 worst countries for workers.
Inpetteng ni Laguesma a saan a nainkalintegan daytoy ken saan a daytoy ti pudno a mapaspasamak iti pagilyan.
Maladingitan pay ti sekretaryo gapu ta saan a nakaaawat ti inpaay a rating ti International Trade Union Confederation iti pagilyan nga inikkan na ti Pilipinas ti rating a 5 a mangipasimudaag ti pannakaipapaidam ti karbengan dagiti mangmangged.
Dinakamat pay ti International Trade Union Confederation ti red-tagging ken ti pannakapapatay ti Filipino labor unionist, karaman ditoy da Business Process Outsourcing (BPO) Industry Employee Network organizer Alex Dolorasa ken Kilusang Mayo Uno (KMU) organizer Jude Thaddeus Fernandez.
Inpalgak ti International Trade Union Confederation a ti pannakapapatay ti dua a mabigbig nga unionist ket nangparnuay ti buteng ken panangpaulimek iti boses dagiti mangmangged.
Kwinestyunaran pay ni Laguesma ti report a kinakurang ti access iti karbengan dagiti mangmangged.
Inpetteng ni Laguesma a dagiti nadakamat a kaso ket saan paylaeng nga umdas tapno mairaman ti Pilipinas iti listaan ti worst countries para kadagiti mangmangged.
