LAOAG CITY – Ikonkonsiderar ti Department of Environment and Natural Resources (DENR) ti temporaryo a pannakapaserra iti Manila Baywalk Dolomite Beach agingga a saan a malpas ti expansion daytoy.
Segun ken ni Interior Undersecretary Jonathan Malaya, plano ti DENR nga iserra amin uray dagiti nalpasen a paset ti dolomite beach kabayatan a maiyus-uswat ti construction iti sumagmamano a paset ti kontrobersiyal a beach.
Inbatad na a possible nga ipatungpal da daytoy kalpasan ti Undas ken malukatan to laengen kalpasan a makumpleto ti expansion daytoy.
Immunan a nairakurak a mangrugi ita nga aldaw Oktubre 29 agingga iti Nobyembre 3 ket mapaserraan ti dolomite beach kas maiyataday iti direktiba ti Inter Agency Task Force (IATF) para iti panangobserbar ti Undas wenno ti All Souls’ ken All Saints’ Days.
Maipalagip a nakaad-ado dagiti negatibo a komento gapu iti kinaado dagiti tattao a nagturong iti lugar iti panaglukat ti dolomite beach.
Nagpadespensar ni DENR Sec. Roy Cimatu gapu ta saan a nasurot ti social distancing iti panaglukat ti Dolomite beach gapu iti kinaado dagiti tattao a naturong iti lugar.
Mainaig iti daytoy, inikkat ni Cimatu ti Manila Bay Coordinating Office deputy executive director a ni Jacob Meimban Jr. kas ground commander ti Dolomite beach gapu iti nasao nga insidente.
