LAOAG CITY – Naiteden ti Philippine Amusement and Gaming Corporation wenno PAGCOR dagiti inkarina nga idonarna iti Ilocos Norte kabayatan ti naisayangkat a “Bawat Buhay Mahalaga” wenno BBM Caravan iti arinunus ti napalabas a tawen 2024.
Umabot iti 970 a Go Bags ti naipaima iti Provincial Health Office idinto a dua a 2D Echo wenno 2D echocardiogram ken innem a potable ventilator ti naipaima iti Gov. Roque B. Ablan Sr. Memorial Hospital ditoy ciudad ti Laoag.
Segun ken ni Provincial Health Officer Dr. Rickson Balalio, maited dagiti nasao a Go Bags kadagiti nagduduma a barangay ditoy probinsia idinto a dagiti portable ventilator ket maipaay kadagiti district hospital ti probinsia.
Inbatad na a ti maysa a 2D echo ket maipaay iti Bangui District Hospital ken ti maysa ket agtalinaed iti Governor Roque Ablan Senior Memorial Hospital.
Mainaig iti daytoy, nagyaman ti gobierno probinsial kadagiti nasao a donasyon nga inpaay ti PAGCOR ken ti opisina ni Pres. Ferdinand R. Marcos Jr.
Ibilangda a dakkel a mangitag-ay iti pannakatagiben ti salun-at dagiti umili dagiti naipaay a tulong ditoy probinsia.
