LAOAG CITY – Balligi ti panangiyuswat ti Department of Science and Technology ti Regional Science Technology Innovation Week ditoy probinsia nga addaan ti tema a 2024 Handa Pilipinas Innovations in Climate and Disaster Resilience.
Segun ken ni Dr. Renato Solidum Jr., Department of Science and Technology – Region 1 Secretary, gagem ti ahensia a maisuro ti panagusar ti teknolohia no adda ti sumangbay a didigra.
Inbatadna a babaen iti daytoy ket maadalan dagiti umili no ania ti rumbeng nga aramidenda no mapasaran ti kalamidad.
Malaksid iti daytoy, kunana a mabalin pay a mausar dagiti teknolohia iti pamastrekan babaen kadagiti produkto kas kadagiti bado a dumalan mismo iti siyensia ken teknolohia.
Inlawlawagna a babaen kadagiti nagduduma a teknolohia ket ad-adda a naparpartak ti pannakikammayet ti gobierno kadagiti Local Government Units tapno makaaramid ti napinpintas a plano a makatulong iti al-alisto a panagsagana iti didigra.
Kunana a naidasar pay dagiti mabalin nga usaren iti panawen ti didigra kangrunaanna ita a panagtutudo kas iti unsinkable porta boat ken unsinkable water ambulance a para iti rescue operations.
