LAOAG CITY – Inpasigurado ni Atty. Julius Balbas, ti Commission on Election Officer ditoy ciudad ti Laoag nga awanen ti makalapped iti pannakaisayangkat ti Barangay and Sang Kabataan Elections intono Oktubre 30, 2023.
Inrakurak daytoy ni Balbas iti baet ti isyu a rinibo dagiti botante a naduktalan a double registrants.
Inpetteng ni Balbas nga amin dagiti nairekord a double registrants iti opisina da ket inikkat da aminen iti listaan ken saan danto a makabotos intono eleksyon ditoy ciudad ti Laoag.
Kuna na a no kayat ti agbotos dagiti maseknan ket agturong danto iti immuna a nagrehistroan da.
Mainaig iti daytoy, inpakaammo na nga adda ti maangay nga special hearing tapno maamoan no adda pay dagiti dadduma a saan a nakita a double registrants iti listaan da.
Innayon na a napasamak ti double registrants gapu ta idi napan nagrehistro dagiti maseknan ket inbatad dagitoy a damo da ti agrehistro imbes a ti inaplikaran da ket ti transfer form.
Kabayatanna, nadakamat ni Balbas nga adda paylaeng ti sumagmamano nga indibidual a mapmapan iti opisina da tapnp agparehistro ngem inlawlawag da a nalpasen ti panagparehistro.
