Inpetteng ni Senador Risa Hontiveros nga agtultuloy ti “double standard” a panangtrato kenni Pastor Apollo Quiboloy bayat nga aglemlemmeng pay laeng kadagiti otoridad.
Segun kenni Hontiveros agtultuloy pay laeng ti “double standard” kenni Quiboloy gapu ta agtultuloy ti panaglibasna ken saan nga agparang iti Senate hearing.
Kinunana a bayata dagiti ordinario nga umili no maawisda iti Senate hearing ket dagos a tumabuno dagitoy ken saan nga urayen ti pannakaipaulog ti subpoena nangruna dagiti agtungpal a maaresto.
Indasig pay ni Hontiveros ti “double standard” iti panagsuko dagiti paltog ni Quiboloy gapu iti 19 a naipadamag nga armas ti pastor ket lima laeng kadagitoy ti naisuko iti biang ti Philippine National Police (PNP).
Kabayatanna, kinuna ti agmammanday-linteg a no agaplikar ti maysa nga ordinario a tao iti permit-to-carry, ammoda dagiti kondision a no mailibak wenno saan a ma-renew ket maisuko a dagus ken saan a mapaatiddog iti innem a bulan.
