LAOAG CITY – Nangisumitiren ti 1st Engineering District ti Department of Public Works and Highways iti listaan dagiti infrastructure projects a naiyimplementar iti umuna a distrito iti Sang Panlungsod ditoy ciudad ti Laoag.
Segun iti Sang Panglungsod secretary, ti nasao a listaan nga insubmitir ti ahensya ket manipod laeng idi 2024 agingga ti 2025.
Gapo iti daytoy, kiniddaw ni Konsehal Jayson Perera ti listaan ti infrastrature projects manipod 2022-2023 gapo ta 4 a tawen ti kalikagom na a maipaima kenkuana.
Immunan a kwinestyunaran ni Perera ti Department of Public Works and Highways – 1st Engineering District no apay a saan da pay nga insubmitir ti kiddaw ti konseho a listaan dagiti kumpleto nga infrastructure projects.
Segun kenni Perera, nasuroken a dua a bulan ti napalabas ngem agpapan ita ket awan pay ti inted ti ahensya a listaan dagiti proyekto kas iti Asphalt, solar lighting, canals ken dadduma pay.
Inlawlawag na a saan laeng a ti konseho ditoy ciudad ti Laoag ti agkidkiddaw iti daytoy no diket uray pay iti National Bureau of Investigation (NBI).
Inpetteng ni Perera a saan na nga ammo ti rason ti Department of Public Works and Highways – 1st Engineering District no apay a saan da met laengen a mangted ti listaan nga isu ti pagibasaran na no pudno ti dimmanon kenkuana a report nga adda ti maipagarop a ghost projects ditoy probinsya.
Kunana a saan laeng a naminsan a daras a nagkiddaw ti konseho babaen iti Sang. Panlungsod Secretary ngem agpapan ita ket awan pay daytoy.
Innayon na a dagiti nasao a dokumento ti usaren na tapno makumpirmaran na no adda ti kinapudno na ti naidanun kenkuana nga adda dagiti ghost projects ditoy probinsiya.
