LAOAG CITY – Simmungbat ti Department of Public Works and Highways First Engineering District iti panagkiddaw ti lokal a gobierno ditoy ciudad ti Laoag ti pondo para iti pannakaestablisar ti mini park iti Laoag Central School.
Daytoy ti inpakammo ni Vice Mayor Rey Carlos Fariñas kalpasan nga adda ti surat a naawat na manipud iti nasao nga ahensya.
Segun iti Bise Mayor, nakailanad iti surat a ti imprastraktura a kalikagom nga ipatakder ti lokal a gobierno babaen iti pondo ti ahensya ket saaan a maiyannatop kadagiti proyekto a sakupen ti Department of Public Works and Highways.
Kunana a nakalinad pay iti surat ti ahensya dagiti proyekto a mabalin a pondoan da.
Gapo iti daytoy, kuna ti bise mayor nga ipadanon da daytoy iti Committee on Tourism.
Inlawlawag na a malaksid iti panangadal da iti surat ti Department of Public Works and Highways kadakuada ket nasken a matratar pay ti petisyon dagiti nagannak ken mangisursuro kontra iti pannakaestablisar ti mini park iti nadakamat a pagadalan.
Maipalagip nga inpasa ti konseho ti resolusyon nga agkiddaw ti pondo manipud iti ahensya babaen kenni Cong. Sandro Marcos iti panakaestablisar ti mini park.
