LAOAG CITY – Banbantayan dagiti otoridad iti paset ti Kennon Road no sadinno a nabirukan ti bagi ni dati a Department of Public Works and Highways (DPWH) Undersecretary Catalina Cabral.
Nangikabilen ti ahensia dagiti signage iti mismo a lugar ken kadagiti kaasideg daytoy kas panangballaag kadagiti motorista a manggandat nga agsardeng tapno mangala ti selfie, video wenno mangaramid ti vlog.
Immunan nga inlawlawag ti Department of Public Works and Highways a ti nasao nga addang ket tapno malappedan ti nakaro a traffic iti nasao a lugar kagiddan ti panagdudupudop dagiti lugan iti paset ti nasao a kalsada.
Basar iti ahensia, ti baro a pagannurotan ket tapno maprotektaran ti pagsayaatan ti publiko, dagiti motorista ken dagiti bumisita idiay Baguio ken dadduma pay a kaparanget a lugar.
Kabayatanna, iti baet nga adda dagiti naikabil a signages ket adda latta dagiti maipagarup a mangipilpilit nga agsardeng iti lugar isut gapuna a nangi-deploy ti pulisia ti regular patrollers manipud iti Tuba Police Station tapno mabantayan ti lugar.
Maipalagip nga inbatad ti driver ni Cabral a ni Ricardo Hernandez, sakbay ti pannakatay ti dati nga Undersecretary ket immuna a sinita isuda dagiti pulis kapasan a temporario a nagsardeng iti nasao a lugar.
