LAOAG CITY – Inrakurak ni Department of Public Works and Highways Sec. Vince Dizon nga inbilin ni Presidente Ferdinand Marcos Jr. nga ubusen ken pagsungbaten dagiti karaman iti korapsion ditoy pagilian.
Namunganay dagiti tignay protesta iti isyu kadagiti maanomalya a substandard flood control projects a pakairamramanan dagiti sumagmamano nga opisial ti Department of Public Works and Highways, dagiti contractor ken pakairamanan dagiti agpanpanday linteg.
Inbatad ni Dizon a saan nga agsardeng ti ahensia agingga a saan a matungpal ti pammilin ti Presidente kontra kadagiti maanomalya a flood control project.
Inlawlawagna nga insigida a nagtignay ti Department of Public Works and Highways kas maiyallubog iti pammilin ti Presidente, nangipila daytoyen ti tallo a kaso iti Ombudsman, 26 nga indibidual ti nakasoanen, tallo nga opisial ti na-dismiss idinto a 17 pay ti sinuspenso ken naikeddeng a maikkat iti serbisio kadagiti sumarsaruno nga aldaw.
Maipalagip a binukel ni Presidente Marcos ti Independent Commission for Infrastructure (ICI) para iti naun-uneg nga imbestigasion kadagiti maanomalya iti flood control ken dadduma pay nga infrastructure projects tapno labanan ti korapsion.
