LAOAG CITY – Inallukoy ni Department of Public Works and Highways (DPWH) Secretary Vince Dizon ti publiko a tumulong tapno naan-anay a masolbar dagiti maanomalya iti ahensiada.
Nagpanawagan nga agbalin a mata ken lapayag ti pagilian kontra kadagiti palpak wenno dagiti saan a naaramid a proyekto ti Department of Public Works and Highways a maysa a wagas tapno maibutaktak dagiti karaman nga indibidual.
Inlawlawagna a no adda ti makita a mapagdududuaan a proyekto ti Department of Public Works and Highways iti probinsia wenno barangay ket insigida nga alaan ti ladawan ken i-report iti opisinada.
Ginutigotna pay ti publiko nga i-report dagiti opisial ti ahensiada a mangipakpakita ti kinabaknang iti social media kas kadagiti nababalor a kotse ken pagtaengan a saan a tugma iti posisionda.
Kunana a kas ti nakadawyan iti panag-report dagiti “kamote driver,” maipakita met koma dagiti biddot nga aramid tapno matiliw dagiti karaman iti maanomalya.
Innayonna nga amin a karaman iti maanomalya ket mapagsungbat uray pay pagayam wenno kaalyado ni Presidente Ferdinand Marcos Jr.
