LAOAG CITY – Inbatad ni Dr. Alan Taylan ti St. Camillus de Lellis Hospital ditoy siudad ti Laoag a nangatngato ti tyansa a maapektaran ti Urinary Tract Infections (UTI) dagiti babbai ngem dagiti lallaki.
Daytoy ket gapu ta ab-ababa ti urethra dagiti babbai ngem dagiti lallaki.
Inlawlawag ni Dr. Taylan a ti urinary tract infections, ket maala manipud kadagiti mikrobyo a makastrek iti uneg ti bagi a mangitunda iti panagsakit ti bladder ken kidney.
Kunana a no mabaybay-an daytoy a sakit ket mabalin a kumaro mangitunda daytoy ti panagdara ti isbo wenno panag-nana ti isbo.
Innayonna a kadawyan a ma-experience a sintomas ket panaglibeg ken nalabbaga nga isbo, panagsakit ti pus-ong, nabangsit nga isbo, ken dadduma pay.
Kabayatanna, nagpalagip ni Dr. Taylan iti publiko a saan nga iyaleng-aleng dagiti marikrikna a nasakit iti bagi gapu ta adda posibilidad a mangparisgo daytoy iti salun-at.
