LAOAG CITY – Saan a mailawlawag ni Dr. Jun Carlos Maruquin iti ili ti Vintar ti nagun-od na a balligi kalpasan a nakapasa daytoy iti Physician Licensure Examination (PLE).
Inbatad na nga agpapan ita ket arig na saan na pay a masinunuo a maysa isunan a doktor.
Nu pay kasta, kuna ni Maruquin a saan a nalaka dagiti naglabasan na sakbay ti pannakapasa na.
Inbunannag na a ti panagbalin a doktor ket saan a nalaka ken saan met a narigat gapu ta ti kangrunaan a kasapulan ket ti panaganus, panagakumbaba, panagtalek iti bagi ken iti apo.
Inbatad na nga adda dagiti gundaway a nagdudua iti kabaelan na ken adda ti panagamak na agsipod ta karaman isuna iti Pioneer Batch.
Nu pay kasta, inpakaamo na a babaen iti tulong dagiti propesor iti Colllege of Medicine iti MMSU, dagiti doktor nga awan ti sarday na a mangbaybayabay kadakuada kangrunaan iti Mariano Marcos Memorial Hospital and Medical Center (MMMHC&MC) ket saan a naawanan ti namnama.
Innayun na a malaksid iti panagtalek na iti bagi na ket maysa pay ti pandemiya a nangiduron kenkuana tapno agtake ti eksaminasyon ken naan-anay a makatulong iti panagwaswas ti crisis gubuay ti covid-19.
Mainaig iti daytoy, napalaos ti panagyaman ni Maruquin iti pamilya na nangruna iti nagganak na gapu kadagiti sakripsyo ken anus nga inpaayda kenkuana.
Kabayatanna, inbatad ni Maruquin a plano na pay laeng ti aginana tapno maiburay na paylaeng ti oras na iti pamilya na sakbay a maminpinsan nga iserbi na dagiti naadal ken ti naipasa na a propesyon.
