LAOAG CITY – Inpeksa ni Dr. Maribel Manuel iti ili ti Solsona ti pannakadismaya na iti Karmeli Hospital gapu iti nalabes a singir ti ospital kalpasan ti na-confine da iti anak nak.
Segun ken ni Manuel, Hunyo 28 idi na-admit iti ospital gapu iti dengue ken Hulyo 2 idi simmaruno a naiyospital ti anak na gapu iti gurigor.
Inbatad ni Manuel nga iti imuna a tallo nga aldaw na iti ospital ket nagtalinaed iti kwarto nga agbalor ti 2,500 a pisos iti kada aldaw ngem apaman a na-admit met ti anak na ket nairekomendar kenkuana ti 3,250 a balor ti kwarto a pagtalinaedan da a dua ken daytoy ti pinili na.
Kabayatanna, inpakaammo ni Manuel nga iti maysa a lawas a panagtalinaed na iti ospital ken lima nga aldaw iti anak na ket arig nga awan ti nangtamtaming kadakuada a doktor.
Inbatad na a saan na a pulos a nakita a binisita ni Dr. Dallo ti anak na a bayat nga adda iti ospital nu pay daytoy ti naibaga a doktor na.
Innayun na nga uray isuna ket awan a pulos ti panagpakita ti naibaga a doktor na a ni Dr. Rabago malaksid ken ni Dr. Capalungan.
Mainaig iti daytoy, kuna ni Manuel a gapu iti panabayag da iti ospital nga arig nga awan ti husto nga atensyon a medical a maipapaay kadakuada ket nagkiddaw a maparuar dagitoy.
Inbatad na a nakisarita a nakasagana nga agpirma iti aniaman a waiver iti panagruar da ken idi napalubusan dagitoy ket naklaat iti nagbalin a bill da iti anak na.
Inpakaammo ti doktor nga umabot iti 72 a ribo a pisos ti bill na idinto nga umabot iti 57 a ribo a pisos iti anak na.
Immuna iti daytoy, kuna ni Manuel a naipakaammo laeng kenkuana a dengue positive met ti anak na idi nagkiddaw a rumuar dan iti ospital.
Innayun na a bayat nga adda da iti ospital ket arig a nurse amin ti nangtamtaming kadakuada.
Kuna ni Manuel nga inpakaamo ni ospital a mapakaamoan daytoy nu adda ti maisubli iti binayadan na a bill ngem agpapan ita ket awan pay a pulos ti koordinasyon ti ospital.
Inbatad ti chief nurse iti Karmeli Hospital a ni Mr. Georgen Rapacon a maaprisyar ti ospital nu personal nga agsurat ti reklamo ni Dr. Maribel Manuel.
Kuna na a nasken pay a masolbar ti isyu iti pribado ken nakasagana ti ospital nga agsungbat kadagiti reklamo ti doctor.
Mainaig iti daytoy, naamoan ti team ti Bombo Radyo a ni Dr. Rabago ket gapagapo iti abroad kalpasan a nangala iti leave.
Gapu iti daytoy, awan ti gundaway a nakita na a mismo ni Manuel.
Agpapan a maisursurat ti damag ket awan met pay ti nagbalin a palawag ti nadakamat a doktor.
