LAOAG CITY – Inadmitir ni Dr. Marsha Lou Wafan, Officer-in-Charge ti Laoag City General Hospital a napinpintas ti operasyon ti nasao nga ospital idi tawen 2018.
Daytoy ket kalpasan a sinaludsod ni Sangguniang Panlungsod Member Jason Perera kabayatan ti regular session ti konseho pakaseknan iti isyu a panagkiddaw ti ospital a maikkat ti 26 a plantilla position.
Segun ken ni Dr. Wafan, sakbay pay a timmaod ti COVID-19 pandemic ket agkurkurangen dagiti agpapaay a Doctor iti nasao nga ospital.
Gapu iti daytoy, gagem ni Perera a maadal a naimbag no apay nga awan ti Doctor nga agkalikagom nga agtrabaho iti Laoag City General Hospital iti baet nga adda ti pagadalan ditoy probinsia a mangididiaya iti College of Medicine.
Mainaig iti daytoy, mamati ni Dr. Wafan a saanen a kayat dagiti sumagmamano a Doctor ti ag-duty ti 24 nga oras.
Inlawlawagna no apay a masapol nga ikkatenda dagiti 26 a plantilla position ket gapu ta bakante dagitoy a posisyon sipod pay idi tawen 2014, 2015 ken 2016, idinto a dagiti dadduma ket nag-resign iti kallabes.
Kunana a babaen iti pannakaikkat kadagiti 26 a plantilla position ket makatipid ti pondo iti ospital nga umabot iti 14 milyon a pisos.
Kabayatanna, naammoan nga adda ti 151 a bakante a posision ken ad-adu ti agpapaay kas Contract of Service no idasig iti plantilla posision.
