LAOAG CITY – Nagballaag ni Dr. Norman Rabago, ti covid-19 consultant ditoy probinsya kadagiti agus-usar ti naganna iti nagduduma a wagas.
Immuna iti daytoy, kuna ni Rabago nga adda dagiti nagusar ti nagan na kadagiti catering services ken food chains.
Inbatad na a maysa pay a modus dagiti agus-usar ti naganna ket ti agorder ti makan kageddan ti pananggatang ti load nga agbalor ti rinibo.
Gapu iti daytoy, inbatad ni Rabago nga adda dagiti nailaw-an wenno namati iti modus dagiti agus-usar ti naganna.
Immunan nga inpakaamo ti covid-19 consultant a saan nga isuna ti masansan nga agorder ti makan gapu ta ti sekratarya na ti mangub-ubra daytoy.
Mainaig iti daytoy, ginutigot ni Rabago ti publiko nga agbalin nga alerto ken saan a dagus nga agtalek iti siasinoman.
Innayun na a dimmawat metten ti tulong iti biang ti PNP seknan iti pannakasolbar iti daytoy a banag.
Naamoan a malaksid ken ni Rabago, adda pay dagiti sumagmamano nga opisyal ken doktor a nabiktima ti modus dagiti manglimlimo a tattao.