LAOAG CITY – Inrekomendar ni Dr. Norman Rabago ti COVID-19 Consultant ditoy Ilocos Norte iti Sangguniang Panlalawigan a mangiyestablisar ti Epidemiological and Surveillance Unit ditoy probinsia.
Segun kenkuana, daytoy ket kalpasan a maobserbarna nga awan pay ti naaramid ti probinsia iti nasao a facility a kasapulan iti agdama a situasion.
Inbatadna a babaen iti daytoy ket matulungan ti gagem ti Gobierno Probinsial a pananglapped ti panagngato ti kaso ti COVID-19 ditoy probinsia.
Inpakaammona a lima laeng nga ili ti addaan iti nasao a pasilidad pakairamanan iti ili ti Badoc, Pinili, Vintar, Pasuquin ken Sarrat.
Inlawlawagna a gapu iti daytoy ket kiniddawna kadagiti kameng ti Sangguniang Panlalawigan a mangaramidda ti Executive Order pakaseknan iti daytoy a banag.
