LAOAG CITY – Napalaos ti ragsak ni Dr. Shirley Agrupis, ti presidente iti Mariano Marcos State University (MMSU), iti 100% a passing rate ti unibersidad iti Physician Licensure Examination (PLE).
Segun ken ni Dr. Agrupis dagiti nagtake ti eksaminsyon ket isuda ti pioneer graduates ti College of Medicine iti MMSU.
Binigbig ni Dr. Agrupis dagiti nakapasa nga isuda Dr. Alyssa Mae Agustin, Dr. Everlyn Joy Caluya, Dr. Miguel Patrick Cerezo, Dr. Knedrick Kevin Macalma, Dr. Jun Carlos Maruquin, Dr. Gene Paolo Janzi kenni Dr. Niki Angeli Tabaniag.
Inbatad na a dagiti pito a nakapasa ket tubo ditoy probinsya ken iti Ilocos Sur.
Innayun na a manipod iti 14 a pioneer batch ti College of Medicine ket dagiti pito ti immuna a nakaitured a simmalang iti eksaminasyon.
Mainaig iti daytoy, nagyaman ni Agrupis kadagiti nangirugi ti College of Medicine ken ti sakripisyo dagiti propesor nangruna kadagiti doktor iti Mariano Marcos Memorial Hospital and Medical Center (MMMH&MC) iti siudad ti Batac a kangrunaan a nangbayabay kadagiti baro a doktor.
Kabayatanna, inpagunamgunam ni Agrupis a ti laeng nagbalin a gagem na iti pannagballigi dagiti baro a doktor ket ti panangsuporta na kadagitoy bayat nga agad-adal da ken ti sibubukel a College of Medicine.
