LAOAG CITY – Inpakaammo ni Mrs. Mary Ang, ti Presidente ti Philippine Red Cross Laoag City Chapter ken adda ti dara na nga Intsik a saanen a maiyuswat ti nagbalin a tradision a dragon dance kabayatan iti panangsarabo ti Chinese New Year iti maysa a dakkel a mall iti ili ti San Nicolas.
Segun kenkuana, basar iti pannakisarsaritana ti pannakabagi ti Ilocos Norte Filipino Chinese Chamber of Commerce and Industry Incorporated nga agbalin a simple laeng ti panangselebrar ti Chinese New Year ita a tawen.
Nupay kasta, kunana nga adda ti maiyuswat a simple ken ababa a programa kas ti panangirakurakda kadagiti banbanag a pammati dagiti Intsik a mangited daytoy ti swerte kadakuada.
Inyisturyana dagiti masansan nga ar-aramiden dagiti padana nga intsik tunggal madanon ti panangsabat ti Chinese New Year kas ti panagdalus kadagiti pagtaenganda, panagbayad ti utang, agpapukis dagiti lallaki ken agaruatda ti agmaris ti nalabbaga ken polka dot.
Kunana nga idi awan pay ti pandemiya ket narway dagiti pagtaengan ti Intsik ti agisabsab-it ti nalabbaga a parol a mangipasimudaag ti naulimek ken narang-ay a baro a tawen kagiddan ti panangikararagda kadagiti miembro iti pamiliada a pimmusay.
Inlawlawagna a mamati dagiti Intsik a ti pannakaiyuswat ti dragon dance, panagtambor ti parada ken panagpaputok kadagiti fireworks ket mangpatalaw kadagiti dakes nga espiritu ken mangipaay ti naragsak a masakbayan.
Inbatadna nga agisagsaganada pay ti nian gao wenno tikoy a simbolo kadakuada nga Intsik a ti kinapigketna daytoy ket mangipakpakita ti panagkaykaysa ken no dadduma ket mangit-ited dagitoy ti tikoy kadagiti katrabahoanda iti Gobierno.
Kabayatanna, maselebraran ti Year of the Water Tiger iti daytoy a tawen 2022 nga adda dagiti nakaiyestablisar iti dakkel a mall ti San Nicolas a Year of the Roaring Tiger Display, Chinese New Year Exhibit, Chinese Lantern Display, Cultural Show ken drumbeaters performance.
