LAOAG CITY – Natay ti drayber ti motorsiklo idinto nga under observation ti back ride na kalpasan ti vehicular incident a napasamak iti Brgy. 22 San Cristobal, iti ili ti Sarrat.
Daytoy ti kinumpirmaran ni P/Cpt. Kester Arellano ti hepe ti Philippine National Police iti nasao nga ili.
Segun ken P/Cpt. Arellano, nagsagaba ti nakaro a sugat iti ulo ken nagduduma a paset ti bagi ti dua ngem apaman a matamtaming ti drayber ket ditoy a pimmusay isuna.
Nabigbig ti biktima ken nangiturong iti Red Honda TMX a ni Marianito Asis, agtawen ti 76 ken ti back ride na a ni Ofelia Valdez, agtawen ti 47 ken agpada a residente iti Brgy. 2 Anao iti ili ti Piddig.
Idinto a nabigbig met ti nangiturong ti Toyota Vios a ni Jayson Tolentino, agtawen ti 36 ken residente iti Brgy. Bagut iti ili ti Dingras.
Basar iti inisyal nga imbestigasyon, nag-overtake ni Tolentino iti kasarsaruno na a lugan, ket idi naka-overtake ginandat na nga agsubli iti right lane ngem kellaat a nasapgud na ti motor a nagluganan dagiti bikitima.
Insigida met a naitawag ti insidente iti biang ti Municipal Police Station iti ili ti Sarrat ken nagresponde dagiti kameng ti Rural Health Unit.
Iti agdama, nagtalinaed iti Governor Roque Ablan Sr. Memorial Hospital (GRASMH) ti back ride a ni Valdez para iti naan-anay a pannakataming.
