LAOAG CITY – Nagballigi ti naisayangkat a drive-in concert iti Paoay Sand Dunes iti Barangay Suba iti ili ti Paoay kagiddan ti panaglukat manen ti turismo ditoy probinsya.
Daytoy ti inpannakkel ni Miss Eva Buncayao ti Paoay Sand Dunes Association.
Inbaga na a maragsakan gapu ta nagsublin ti operasyon ti 33 a 4×4 iti sand dunes ken mangnamnama nga ad-ado pay dagiti turista a mapan bumisita iti nasao a lugar.
Nupay kasta, kuna na a tallo laeng ti mabalin nga aglugan iti kada 4×4 no ikompara idi awan pay ti pandemya nga ad-ado dagiti mabalin nga aglugan.
Innayon na a ti bayad iti kada 4×4 ket 2,500 a pisos gapu ta isu ti napagtutulagan da.
Inpakaammo na nga addan to manen ti maisayangkat a driver-in concert intono domingo, Oktubre 18 ita a tawen.
