LAOAG CITY – Naipit ken nasugsugatan ti pahinante ken driver ti maysa a mixer ti DJCM construction kalpasan a nagsikig gapu ta naawanan ti preno a nangitunda ti pannakatennag na iti kataltalonan iti Barangay Pasiocan iti ili ti Bacarra.
Nabigbig ti driver a ni Eric Fiesta Batoon, agtawen ti 43, ken residente iti Barangay 14 iti ili ti Sarrat ken ti kadwa na a ni Kevin Villegas a taga Barangay 15 iti nasao met laeng nga ili.
Segun ken ni Mr. Ramento Domingo, maysa a construction worker ken nakakita iti nasao a pasamak, maipagarop a napataray ti driver bayat nga agsalog iti paset ti by pass road.
Gapo iti daytoy, kuna ni Domingo a nadungpar ti mixer ti barikada, sign board ken landok ti maipaspasdek a proyekto a “canal lining” rason a napasamak ti nasao a disgrasya.
Naamoan a natukkol ti akin-kannawan nga ima ken akin-kannigid a saka ni Villegas idinto a ni Batoon ken saan pay a nakumpirmran no anya ti sinagaba na.
Inbatad met ni Police Major Rommel Ramos, hepe ti PNP-Bacarra, a narigatan da a nangirwar iti naipit a driver.
Agtultuloy met ti imbestigasyon dagiti otoridad mainaig iti nasao a pasamak.
