LAOAG CITY – Pimmusay bayat a maag-agasan iti Governor Roque Ablan Senior Memorial Hospital (GRASMH) ditoy ciudad ti Laoag ni Robert Boridas, agtawen iti 33, driver ken residente iti Barangay Siruna Vill, Antipolo City, Rizal.
Daytoy ket kalpasan nga inpak-ol ti kadwa na a ni Robert Oliva, agtawen iti 24, residente iti Barangay Guiom, Cauayan ti tools iti ulo na bayat ti kaadda da iti ili a San Nicolas.
Segun ken ni Police Chief Inspector Paul Benedict Parado, ti chief of police iti ili a San Nicolas, adda ti napan indeliver ti suspek ken biktima a van iti nasao nga ili.
Nupay kasta, bayat ti panaggiinum da ket nagriri dagiti dua gapu ta maipagarop a saan a napintas ti bingay iti naglakoan da ti napasusup da a krudo nga umab-aboten iti 11 ribo a pisos.
Iti agdama, nagtalinaed ti bangkay ti biktima iti maysa a funeral home gapu ta maiyur-uray pay laeng ti pamilya na manipod idiay Antipolo City idinto a ti suspek ket adda iti kustodyar ti PNP-San Nicolas ken maiyur-uray ti kaso a maipila kontra kenkuana.
