LAOAG CITY – Natay ti driver ti kurong-kurong kalpasan a nadisgrasya iti national highway a sakupen ti Brgy. 32 Corocor, iti ili ti Bacarra.
Binigbig ni P/Lt.Col. Roldan Suitos ti hepe ti Philippine National Police iti nasao nga ili ti driver a ni Reotutar Jovannie Bueno, agtawen ti 32, addaan ti live-in-partner, maysa a cook, tubo iti Brgy. Mariquet, Solsona ngem agdama nga agnanaed iti Barangay Carusikis iti ili ti Pasuquin.
Segun ken P/Lt.Col. Suitos, inmaneho ti biktima ti Honda TMX 125 nga agmaris ti abo ken nangisit.
Basar iti imbestigasyon, agturong ti biktima iti abagatan a paset iti nasao a lugar idi kellaat a naawanan ti kontrol ti manibela ti biktima iti kurbaan a paset ti kalsada rason a na-overshoot daytoy iti kurbaan.
Kas resulta, naidungpar ti biktima iti maysa a poste no sadinno a nagsagaba daytoy ti nakana a sugat nangruna iti ulo na.
Insigida met a naitaray iti Bacarra Rural Health Unit ti nasao a biktima ken naiyakar iti Gov. Roque Ablan Sr. Memorial Hospital ngem naideklara a dead on arrival babaen ti attending Physician.
Naammuan a ti biktima ket aggapu iti ili ti Pasuquin ken agturong kuma iti ili ti Solsona ngem dita metten a napasamak ti nakaam-ames nga insidente.
Malaksid iti daytoy, naammuan pay a ti biktima ket adda impluwensya na iti nasanger.
Kabayatanna, kuna ni Suitos a ti kurong-kurong ti biktima ket nagtalinaed iti salinong ti kapulisan iti ili ti Bacarra, no sadinno nga iyur-uray da laeng ti pamilya ti biktima a mang-claim iti daytoy.
