LAOAG CITY – Natay ti driver ti kurung-kurong idinto a nasugatan ti pasahero na kalpasan a nadisgrasya da iti paset ti Barangay 3, Loieng iti ili ti Piddig.
Daytoy ti kinumpirmaran ni Police Major Kristian Lee Badua, ti chief of police iti ili ti Piddig.
Segun ken ni Badua, iti imbestigasyon da ket naamoan a kabayatan nga agpapaabagatan ti kurung-kurong iti national highway ti nadakamat a barangay ket napukawan iti kontrol ti manibela ti driver.
Inbatad ni Badua a ti driver ken pasahero na ket agpada nga agtawen ti 18 ken residente dagitoy iti Barangay Barcelona iti ili ti Solsona.
Inpakaammo ni Badua nga idi nadlaw ti pasahero a napukawan ti kontrol iti manibela ti driver ket nagtapwak a dagus idinto a nagbalbaliktad ti kurung-kurong karaman ti driver na.
Gapu iti napasamak ket nagsagaba ti nakana a sugat iti ulo ti driver idinto a ti pasahero ket adda met ti sinagaba na a sugat.
Naitaray nga agpada iti ospital dagiti biktima ngem naideklarar ti driver a dead on arrival.
Mainaig iti daytoy, kinumpirmaran pay ni Police Mayor Badua nga agpada nga adda iti impluwensya ti nasanger dagiti dua a nakalugan ti kurung-kurong.
Kabayatanna, nagpalagip manen ni Badua a liklikan ti agmaneho no nakainom ti nasanger tapno maliklikan ti disgrasya.
