LAOAG CITY – Natay ti driver ti maysa a kurung-kurung kalpasan a naidungpar ti garbage truck a nakaparada ti paset ti Vintar road ditoy ciudad ti Laoag.
Nabigbig ti biktima a ni Melwin Baay, addaan ti umno a tawen ken residente ti Barangay Esperanza, Vintar, Ilocos Norte.
Segun ken ni PO1 Bradley Villanueva ti PNP-Laoag, mapan koma agibasura ti nasao a garbage truck ti Barangay Sail idi maperdian.
Inbatad na a bayat nga iyur-uray dagiti dua a pahinante ti truck ti mapan mangtarimaan ket dimteng ti kurung-kurung nga inturong ni Baay ken adda ti kadwa na a maysa.
Kuna ni Villanueva a possible a saan a nakita ni Villanueva ti nakaparada a truck a nagresulta ti pannakaidungpar ti inturong na a kurung-kurung.
Rumrumuar a nakainom ti nasanger ni Baay ken ti kadwa na a nakalugan ti kurung-kurung.
Gapu ti napasamak, nagsagaba ti nakana a sugsugat ni Baay idinto a natukkol ti maysa a saka ti maysa a pahinante ti truck a ni Joselito Borja a residente met laeng ti nasao a ciudad.
Naitaray dagiti biktima iti Laoag City General Hospital (LCGH) ngem naideklara a natayen ni Baay.
