LAOAG CITY – Nasuspenso a dagus ti driver ti Modern Jeep nga addaan to rota a Laoag-Bacarra-Pasuquin kalpasan a pinataray na a dagus ti iturturong na a lugan iti baet a saan pay a naan-anay a nakababa ti pasahero na a maysa nga estudyante.
Nabigbig ti driver a ni Sherwin Butac, residente iti Barangay San Juan iti ili ti Pasuquin.
Segun ken ni Mr. Neptalie Dumlao, ti Corporate Secretary ti Modernize Jeep, ni Butac ket reliever laeng.
Immuna iti daytoy, mabuya iti video a naipatulod iti Bombo Radyo a naipaidda ti estudyante kalpasan a pinataray a dagus ti driver ti lugan uray saan pay a nakababa daytoy.
Inpetteng ni Dumlao a saan a maiparbeng ti inaramid ni Butac rason a sinuspenso da a dagus daytoy ken ibaklay na amin ti magastos para iti idadalan ti medical examination ti nasao nga estudyante.
Innayon na a naipadanun payen daytoy a pasamak iti Philippine National Police.
Mainaig iti daytoy, iti panagturong ti Bombo Radyo iti Land Transportation Office (LTO) ditoy ciudad ti Laoag ket nagkedked paylaeng ti mangidadaulo iti nasao nga opisina a nangipaay ti komento na gapu ta iyuray na paylaeng ti report manipod iti nailian a pulisya.
Innayon ti Land Transportation Office chief a no bilang addan ton ti maala da a report manipod iti Philippine National Police ket ipatulod danto iti Regional Office.
Inpakaammo ti Land Transportation Office a ti Regional Office ken ti Land Transportation Franchising and Regulatory Board (LTFRB) ti mangibaga no ania a pannusa ti maipataw ken ni Butac.
