LAOAG CITY – Nadungpar ti maysa a babai iti maysa a motorsiklo iti National Highway a paset ti Brgy. 40, Buyon iti ili ti Bacarra.
Nabigbig ti biktima a ni Susan Guieb, agtawen ti 34, naasawaan ken residente ti nasao a Barangay.
Segun ken ni Police Staff Sergeant Francisco Galo, ti Investigator On Case, ti driver ti motorsiklo nga RKS 150 nga agmaris ti nangisit nga addaan ti plate no. nga MC AA 52793 ket ni Aldrin George Lucas Corpuz y Asuncion, agtawen ti 20 ken residente ti Brgy. 55-A ditoy ciudad ti Laoag
Inlawlawag ni Galo a kabayatan a dumaldalyasat ti motorsiklo nga agpa-amianan a direksion ket kellaat lattan nga adda limmasat iti kalsada manipod iti abagatan a linya ti kalsada.
Gapu iti daytoy, kunana a nagsagaba ti sugat ti akin-kannawan nga ima ti biktima ken nagdara ti bibig na idinto a nagsagaba met ti sugat iti nagduduma a paset ti bagi ti driver ti motorsiklo rason nga agpada dagitoy a naitaray iti Governor Roque Ablan Senior Memorial Hospital para iti naan-anay a pannakataming da.
Inbatad na a mapan koma gumatang iti maysa a tiangge ti biktima idinto a ti driver ti motorsiklo ket mapan iti ili ti Bacarra.
Kunana a saan met a napaspas ti taray ti driver ti motorsiklo ken awan iti impluwensiya ti nasanger daytoy.
Innayon ti Imbestigador nga inkari metten ti driver ti motorsiklo ti panangtulong na iti gastusen ti biktima.
