LAOAG CITY – Naawanan ti puot ti maysa a driver ti motorsiklo idinto nga uppat dagiti nasugatan agraman ti menor de edad kalpasan ti aksidente iti Brgy. 7 iti ili ti Bacarra.
Nabigbig ti driver ti motorsiklo a ni Ronnie Garlitos, adda iti umno nga edad, ken residente iti Brgy. 2 iti nasao nga ili.
Nasugatan met da Lemmuelle Alceida y Sagayag, agtawen ti 33, naasawaan, mannalon, driver ti maysa pay a motorsiklo ken residente iti Brgy. 21 iti nasao nga ili; Monsito Gaoiran y Felipe, agtawen ti 53, driver ti jeep ken residente iti Brgy. 48-A Mangato ditoy siudad ti Laoag ken dagiti nakalugan ket da Marvin Dalo y Baccay, agtawen ti 20, residente iti Brgy. Badduang iti ili ti Pagudpud ken maysa nga agtawen ti 17 a taga Brgy. 50 Buttong ditoy siudad.
Iti imbestigasyon dagiti otoridad, bayat nga idurduron ni Alceida ti motorsiklo na nga agpadaya a direksiyon ket kelaat a nasapgud ti motorsiklo nga inturong ni Garlitos.
Gapu iti daytoy, naidasay dagiti dua idinto a nabattog ti motorsiklo iti tengnga ti kalsada.
Lumabas met ti jeep nga inturong ni Gaoiran nga agpadaya a direksiyon ken nakita na ti motorsiklo iti kalsada rason a liniklikan na ngem naidungpar iti poste ti North Wind Corporation.
Nagsagaba ti sugat da Alceida kenni Gaoiran agraman dagiti dua a pasahero na iti nagduduma a paset ti bagi da.
Naitaray dagitoy iti ospital partikular kenni Garlitos a naawanan ti poot.
Naamwan nga adda iti impluwensya ti nasanger ni Garlitos bayat nga agiturturong ti motorsiklo.
