LAOAG CITY – Nagtalinaed iti ospital ti maysa a lalaki kalpasan a nagsagaba ti sugat iti ulo gapu iti pannakaidungpar ti inturong na a motorsiklo iti maysa nga SUV adventure iti paset ti bypass road a sakupen iti Brgy. Tangid ditoy Siudad ti Laoag.
Binigbig ni Police Staff Sergeant Alexson Rosal, ti Duty Desk Officer ti Philippine National Police Laoag Traffic Division ti driver ti motorsiklo a Yamaha Mio Aerox a ni Harry Ocampo, agtawen ti 22 ken residente iti Brgy. Baruyen iti ili ti Bangui.
Kuna na a ti met nangiturong ti Adventure nga agmaris ti maroon ket ni Vincent Paul Sapaden, agtawen ti 28 ken residente iti Brgy. 1, Sta. Rita iti ili ti Bacarra.
Inbatad ni Rosal a bayat nga agpa-amianan ti adventure ket kellaat a dimmungpar iti likod ti lugan ti nakamotorsiklo nga agturong met iti kapada a direksion.
Gapu iti daytoy, kunana a nagsagaba ti sugat ti nakamotorsiklo kangrunaan iti ulo ken dagus a naitaray iti Governor Roque Ablan Sr. Memorial Hospital para iti naan-anay a pannakatamingna idinto a saan met a naan-ano ti nangiturong ti Adventure.
Mainaig iti daytoy, inpakaammo ni Rosal a gapu iti napigsa nga impact ket napitpit iti likod a paset ti Adventure idinto a naparpar ti sango a paset ti motorsiklo.
Naamoan a napaspas ti taray ti nakamotorsiklo ken adda ti impluwensiya ti nasanger idi napasamak ti desgrasia.
Kabayatanna, kalikagum ti driver ti Adventure a pabayadan ti nadadael a paset ti luganna apaman a maimbag ti nangiturong ti motorsiklo.
Agpapan a maisursurat ti damag ket plano a maiyakar iti Mariano Marcos Memorial Hospital and Medical Center iti siudad ti Batac ti biktima.
