LAOAG CITY – Nauram ti maysa nga indibidual kalpasan a nadisgrasia iti nagluganna a motorsiklo iti Padsan Bridge iti Barangay 45, Tangid ditoy siudad ti Laoag.
Nabigbig ti biktima a nangiturong ti Yamaha Aerox a ni Mark Renier Laureta, agtawen ti 19, tubo idiay Vigan, Ilocos Sur ngem agdama nga agnanaed iti Barangay 13 ditoy siudad ti Laoag idinto a ti kinalubonna ket maysa a babai nga agtawen ti 17 ken residente ti Barangay San Marcelino iti ili ti Dingras.
Nabigbig met ti driver ti SUV a Nissan Patrol a ni Anthony Elo Lazaro, agtawen ti 39 ken residente ti Barangay 1, San Francisco iti ili ti San Nicolas.
Basar iti imbestigasion ti Laoag City Police Station – Traffic Division, agarup 4:40 ti parbangon, kabayatan a dumaldalyasat ti nakamotorsiklo nga agturong nga agpa-amianan iti paset ti Padsan Bridge ket kellaat a nadungparna ti naka-parking nga SUV a nakasango iti amianan.
Gapu iti daytoy, iti kinapigsa ti impact ti disgrasia ket nauram ti driver ti motorsiklo idinto a naipurwak ti kinalubbonna ken nagsagaba ti sugat iti nagduduma a paset ti bagina.
Naideklarar a dead on the spot ti driver ti motorsiklo babaen iti responding physician a ni Dr. Rodrigo Catcatan idinto a ti kinalubbonna ket naitaray iti Governor Roque B. Ablan Sr. Memorial Hospital para iti pannakatamingna ken saan met a naan-ano ti nangiturong iti SUV.
Mainaig iti daytoy, inpakaammo ni Mr. Christian Bonifacio, kadua ti driver ti SUV a nag-parking-da iti igid ti rangtay gapu ta naawananda ti gasolina isut gapuna a napan gimmatang ti gasolina ti kaduana a driver ti SUV.
Inlawlawagna a naka-hazard lights ti luganda kabayatan a naka-parking daytoy kagiddan ti panangipakitana ti cellphone-na a naka-flashlight.
Kunana nga amin met a dimmalyasat a behikulo ket liklikanda ti luganda a naka-parking ngem ti nakamotorsiklo ket nagdirdiretso daytoy a nangitunda ti pannakaidungparna.
Inpettengna a napaspas ti taray ti motorsiklo rason a posible a saanna a naripar ti luganda a naka-parking.
Innayonna a ginandatda pay a guyuden ti biktima manipud iti motorsiklona a maur-uram ngem narigatanda nga ikkaten isuna gapu ta naipit daytoy ken alisto a nagramram ti apoy.
Naammoan a maipagarup nga aggapu iti maysa a bar ken rumrummuar a nabartek ti driver ti motorsiklo idinto a mapan ag-camping iti Mount Lammin dagiti nakalugan iti SUV.
Kabayatanna, agpada nga addaan ti driver’s license ti dua a driver.
