LAOAG CITY – Natay ti driver ti motorsiklo kalpasan a naidungpar iti 10 wheeler truck iti Paoay-Balacad Road bisinidad ti Brgy. 22 Nagbacalan iti ili a Paoay.
Nabigbig ti biktima a ni Raymund Villaros y Orcino, agtawen 22, awanan asawa ken residente iti Brgy. 15 Suba, Paoay idinto a ti driver ti 10 wheeler truck ket ni Danilo Inocente y Jose, agtawen 39, naasawaan, ken residente iti Brgy Dammang, Sanchez Mira, Cagayan.
Kadwa ni Inocente dagiti dua a pahinante na a da Renel Viernes y Inocente, agtawen 32 ken Richard Inocente y Jose, agtawen 41 ken agpada a residente iti Brgy Dammang, Sanchez Mira, Cagayan.
Basar iti imbestigasyon, bayat nga agpapaamianan a direksyon ti truck ken bayat nga agpapaabagatan a direksyon ti motorsiklo ket maipagarup immagaw ti linya.
Gapu iti dayta, naidungpar ti motorsiklo iti truck ket dita a naipurwak ti biktima ken naipasirok daytoy iti maysa a kotse nga apagiso a lumabas iti nakapasamakan ti disgrasya.
Dead on arrival ni Villaros iti ospital gapu kadagiti sinagaba na a nakana a sugat iti ulo ken nagduduma a paset ti bagi na.
Rumrumwar a nagsisina dagiti partes ti motorsiklo idinto a nabubuong wind shield head light ken flasher ti truck.
