LAOAG CITY – Natay ti nangiturong ti motorsiklo ken nasugatan ti kinalubbon na kalpasan ti pannakaidungpar da iti alad iti Brgy. Poblacion 2 Pasuquin, Ilocos Norte.
Ti pimmusay ket agtawen ti 22, awanan ti asawa idinto a ti kinalubbon na ket agtawen ti 23, ken agpada a residente iti Brgy. San Lorenzo iti ili ti San Nicolas.
Iti imbestigasyon dagiti otoridad, agpaamianan dagiti biktima a nakalugan ti motorsiklo ken idi nadanon da ti kurbaan a paset ti kalsada ket naawanan ti driver ti kontrol iti manibela.
Gapo iti daytoy, naidungpar dagiti biktima iti alad a nangitunda iti pannakaipurwak ti nakalubbon ken nauram ti motorsiklo.
Naamoan nga adda met ti nakakita iti maur-uram a motorsiklo ken isu ti nangguyod iti driver manipud iti lugan na.
Agpada a nagsagaba ti sugsugat iti bagi dagiti biktima ken naitaray da iti Rural Health Unit iti ili ti Pasuquin ken ngem naideklara a dead on arrival ti driver.
Kabayatanna, maipagarop nga adda iti impluwensya ti nasanger ti driver idi napasamak ti insidente ken nakasuot da ti helmet.
