LAOAG CITY – Natay ti maysa a lalaki kalpasan a nadesgrasya iti bypass road paset ti Brgy. 45 Tangid ditoy siudad ti Laoag.
Ti biktima ket agtawen ti 23 a residente iti Brgy. 41 Balacad ditoy siudad.
Segun ti PNP Laoag, kabayatan nga inturturong ti biktima ti motorsiklo a Yamaha Mio 125 a nagmaris iti puraw ken nangisit iti nasao a lugar, ket kellaat a naawanan ti kontrol iti manibela.
Gapu iti daytoy, naitupar ti ulo ti biktima iti concrete pavement iti kalsada a poon ti panagsagaba na ti nakana a sugat.
Naitaray ti biktima iti ospital ngem naideklara a dead on arrival.
Maipagarup nga adda iti impluwensya ti nasanger ti biktima idi madesgrasya.
