LAOAG CITY – Natay ti driver ti motorsiklo kalpasan ti panagdinnungparda iti maysa met laeng a motorsiklo iti Barangay 22, San Guillermo iti ili ti San Nicolas.
Nabigbig ti biktima a nangiturong ti motorsiklo nga Honda Click a ni Kyle Dama Mamaclay, agtawen ti 32, addaan ti live-in partner ken residente ti Barangay 24 iti ili ti San Nicolas ken nabigbig ti kinalubbonna a ni Rodney Pasion ken residente iti nasao met laeng a barangay.
Nabigbig met ti nangiturong ti motorsiklo a Yamaha Sniper a ni Erickjohn Balantac Clemete, agtawen ti 23 ken residente ti Barangay San Agustin iti ili ti Sarrat ken adda ti kinalubbonna a maysa a babai.
Basar iti San Nicolas Municipal Police Station, kabayatan a dumaldalyasat ti driver ti Yamaha Sniper nga agturong nga agpa-amianan ket nag-overtake ti nangiturong ti Honda Click nga agturong nga agpa-abagatan.
Rumrummuar iti imbestigasion a napan iti sabali a linya ti kalsada ti nangiturong ti Honda Click a nangitunda ti panagdinnungparda iti driver ti Yamaha Sniper.
Gapu iti daytoy, nagsagaba ti sugat iti nagduduma a paset ti bagi dagiti maseknan a nakalugan ti dua a motorsiklo nga insigida a naitaray dagitoy iti Mariano Marcos Memorial Hospital and Medical Center iti siudad ti Batac para iti naan-anay a pannakatamingda.
Nupay kasta, naideklarar a dead on the spot ti nangiturong ti Honda Click babaen iti attending physician a ni Dr. Sinamar Ann DL Abando.
Naammoan a saan a nakasuot ti protective helmet ken high visibility vest ti biktima idi napasamak ti disgrasia.
