LAOAG CITY – Nagtalinaed iti ospital dagiti dua nga indibidual nga agpada a biktima ti napasamak a desgrasya iti Ventura Highway a paset ti Brgy. 32-B Lapaz ditoy siudad ti Laoag.
Basar iti inisyal a report a nakalap ti Bombo Radyo Laoag manipod iti PNP-Traffic division ditoy siudad, aggapo iti gasolinaan ti nangiturong ti all terrain vehicle wenno ATV ken lumasat iti kalsada ken agturong iti amianan.
Kabayatanna, ti driver ti ti motorsiklo ket agturong iti amianan ken napaspas ti taray na ken dita a nagdinnungpar dagiti dua a behikulo.
Gapu iti daytoy, naibelleng ti ginatang a gasolina ti nangiturong ti ATV nu sadino a natamaan ti nangiturong ti motorsiklo agingga a naggilyaab.
Dagus a nauram ti bagi ti driver ti motorsiklo ken nagsagaba ti 3rd degree burns idinto a sugat iti nagduduma a paset ti bagi ti sinagaba ti nangiturong ti ATV.
Agpada a naitaray dagiti maseknan a driver iti Mariano Marcos Memorial Hospital and Medical Center iti siudad ti Batac para iti naan-anay a pannakataming da.
Rumrumuar nga adda ti kalinnumba ti driver ti motorsiklo rason a napaspasa ti taray na idi napasamak ti desgrasya.
Kabayatanna, agtultuloy ti imbestigasyon dagiti otoridad kalpasan ti insidente.
