LAOAG CITY – Kinumpirmaran ni Police Capt. Julius Basallo, hepe ti PNP Bangui a basol ti driver ti motorsiklo no apay a napasamak ti nakaam-ames a desgrasya iti Brgy. Lanao iti nasao nga ili.
Nabigbig ti driver a ni Neil Sherwin Antonio y Cabusas, agtawen ti 22 ken residente iti Brgy. Malasin iti nasao met la nga ili.
Inlawlawag na a gapu iti panangdungpar ti agpapaabagatan a direksiyon a motorsiklo iti agpapamianan a kurong-kurong nga inturong ni Junjun Ventura a taga Poblacion Uno iti ili ti Pagudpud ket naregreg ti backride na a ni Gina Ventura rason a nalidlidan ti GMW Bus nga agpaabagatan met a direksiyon.
Naamuan nga immuna a nagdinnungpar ti motorsiklo ken kurong-kurong gapu iti panagovertake ti nakamotorsiklo iti sarsarunwen na a Bus iti paset ti Bolo Bridge.
Inbatad ni Basallo, a nagtalinaed iti kustudiyar ti PNP ti driver ti bus a ni Jerry Bayaca y Dicierto, agtawen ti 47, naasawaan ken residente iti Brgy. Fugu, Ballesteros, Cagayan.
Segun kenni Basallo, awan pay ti nagsaritaan dagiti maseknan a partido iti nasao nga insidente.
Innayon na a pilaan da latta ti kaso a reckless imprudence resulting to homicide ken damage to properties dagiti maseknan.
Kageddan iti daytoy, nagpalagip ni Basallo kadagiti motorista nga agbalin a responsable ti panagmaneho tapno maliklikan ti aniaman a disgrasya.
