LAOAG CITY – Nakaruaren iti detention facility ti driver ti SUV a naidungpar iti bollard ken entrance ti departure area iti Ninoy Aquino International Airport Terminal 1 idi Mayo 4.
Basar iti Manila International Airport Authority, nawaya-wayaan ti agtawen ti 47 a driver kalpasan a nagpiyansa ti 100 a ribu a pisos manipud iti pammilin ti Pasay City Regional Trial Court.
Maipalagip a dua ti pimmusay iti nasao nga insidente pakairamanan ti agtawen ti lima nga ubing a babai a nangitulod laeng iti amana nga agturong idiay Europe.
Kabayatanna, karaman pay ti agtawen ti 28 a lalaki a rummuar koman iti pagilian idinto nga adda pay dagiti sumagmamano nga indibidual a nasugatan a nairamraman iti nasao a pasamak.
