LAOAG CITY – Nagballigi ti insayangkat a drug buy-bust operation ti Provincial Drug Enforcement Unit (PDEU) iti panangidaulo ni Police Chief Master Sgt. Harold Nicolas ken ti Philippine National Police (PNP) iti Barangay 23 ditoy ciudad ti Laoag.
Nabigbig ti subject ti operasyon a ni Reczor Bartolome, agtawen ti 35, driver ti pampasahero a jeep nga addaan ti rota a Laoag-Piddig ken residente iti Barangay Loing, Piddig, Ilocos Norte.
Natiliw ni Bartolome kalpasan a naglako ti maysa nga heat sealed plastic sachet a naglaon ti maipagarop a shabu nga agbalor ti sangaribo a pisos iti nagpammarang a police poseur buyer.
Malaksid ti daytoy, adda pay dagiti sumagmamano a sachet a naglaon ti maipagarop a shabu.
Malaksid ti daytoy, nakakumpiskar pay dagiti otoridad ti maysa a sachet nga addaan ti maipagarop a residue ti shabu ken wallet.
Naamoan a ni Bartolome ket saan a drug surrenderee.
