LAOAG CITY – Nagtalinaed ti maysa a driver ti pampasahero a jeep iti PNP Banna kalpasan a simmuko daytoy.
Daytoy ket kalpasan ti napasamak a panagdinnungpar ti nasao a pampasahero a jeep ken maysa a motorsiklo iti Brgy 20 iti ili a Sarrat a nakatayan ti driver ti motorsiklo a ni Joey Ressurecion a residente ti Brgy. 19 iti ili a San Nicolas.
Binigbig ni Police Insp. Julmusa Saat, deputy chief of police ti PNP Sarrat ti driver ti jeep ket ni Joey Rumualdo a residente ti Banna.
Inlawlawag ti opisyal a nagpadaya ti direksyon ti jeep idinto nga agturong iti San Nicolas ti biktima idi ta kellaat a nagdinnugpar da.
Kuna ni Saat a tawagan da ti pamilya ti biktima tapno makapagsasarita da iti partido ti driver.
Innayon na a posible a sumango ti driver iti kaso a murder gapu ta mabalin nga inranta na wenno reckless imprudence resulting to homicide no mapaneknekan nga aksidente.
Immuna iti daytoy, naideklara a pimmusay ti biktima sakbay a dumanon iti ospital.
Kabayatanna, agtultuloy ti imbestigasyon dagiti otoridad kalpasan ti nasao nga insidente.
